Fire nye år for Kikki Kleiven

Kikki Kleiven har markert seg med ei tydeleg stemme innan klimaforskinga og klimautviklinga på planeten. Forsking og forskingsformidling er særleg viktig i verdssituasjonen me har i dag.  

- Eg er svært glad for at Kikki Kleiven ynskjer å fortsetje som direktør for Bjerknessenteret i ei ny åremålsstilling. Aldri før har Bjerknessenterets arbeid og synlegheit i samfunnsdebatten vore viktigare enn no, seier styreleiar i Bjerknessenteret Rebekka Borsch.

  
-Klimaforskinga er under press og direkte angrep i fleire land, samtidig som vi ser stadig fleire alvorlege konsekvensar av klimaendringar i verda. Med Kikki ved roret har senteret vakse og utvikla seg på fleire strategisk viktige områder, i tillegg gjer ho ein kjempeinnsats for å løfte klimaforskinga overfor avgjerdstakarar og i media, seier Borsch. 

Beredskap for gjennombrot  

Dei kommande fire åra har Kleiven ambisjonar om å våge meir. Både stimulere breidda og samtidig ha ein beredskap for at dei største gjennombrota kan kome der ein minst ventar det. Bjerknessenteret har også ein unik posisjon med stabil finansiering.

 
- Det gjer oss i stand til å vidareutvikle eit forskingsmiljø som gir ringverknader nasjonalt og internasjonalt og som er synleg og attraktivt. Våre forskarar er effektive i å bringe kunnskapen ut i samfunnet, og eg vil gjerne stimulere fleire av våre forskarar til å bidra i samfunnsdebatten. Dette er viktig for eit trygt og sikkert samfunn, og er kunnskap som i aukande grad trengs ettersom dei globale temperaturane stig og klimautfordringane veks, seier Kleiven.  

Samarbeid

Bjerknessenteret for klimaforskning samlar forskarar frå 40 land og i år feira senteret 25 års jubileum. 

- Bjerknessenteret er navet i norsk klimaforsking, og eg ser fram til å få bidra vidare til å stimulere og styrke samarbeidet mellom forskarane i senteret og med samarbeidspartnarar internt og eksternt. Vi er eit unikt og inkluderande fellesskap med engasjerte forskarar og saman flyttar forskinga vår grenser, seier Kleiven.  

Kleiven, som tok over jobben etter Tore Furevik i 2021, blei tilsett i fire nye år på gårsdagens styremøte på Universitetet i Bergen. 

- Vi er glade for at Kikki Kleiven skal lede Bjerknessenteret for klimaforsking også dei fire neste åra. Saman skal vi framleis bygge UiB som eit sterkt internasjonalt forskingsuniversitet, seier UiB-rektor Margareth Hagen til På Høyden.